Knjiga ot Štefeka z Međimorja
subota, 16.04.2016.
DOK SEM IŠEL F ŠKOLO
PRVI DEN ŠKOLJE
Komaj sem čakal da pem f školo kaj se bom z decom igral i poril i kaj bom jel f školski kuhnji južino s pljehnotoga lončeka koj se sveže na torbo i unda kloponče dok se ide f školo.
Kaj za inat, te je den išla mama na polje graha brot, a jo sem se ne mogel ščakati kaj dojde dimo i kaj me otpelja f školo. Več je i polne zvonilo, a nje nega dimo. Bil sem joko stroho da bom zamodil f školo, i to mom prvi den. Odbežal sem Grintafco i on mje rekel da on i njegva mama pedo f školo samo dok se još naobedojo.
Več sem ne mogel zdržati i sprojim se jo ljepo na polje f Kočak mamo iskat. Dojdem f Kočak, a mame nigdi. Hodim gori-dolji, zovem, alji nišče da bi beknol. Idem dalje i dalje i još dalje. Rožđe i kurzinje me je več sega zdropalo i unda sem se počel bečati, a šmrklji so mi išlji v zobe. I begam jo po kuruzi, alji nikak nemrem trefiti nazoj na pot. Bežim jo sim-tam, mamo zovem, alji zabadaf. Negda teda konačno sem došel s kuruze vun i begac dimo. Dojdem dimo, a mame nega. Idem k sosedi Dori i pitam njis alji znodo de je moja mama. A soseda Dora – ljusk. Tak so me počilji z rokom po riti kaj sem se zanesel i počelji so vikati na mene:
– Ti nepodojenec jen! De si ti? Tak si zdropani kaj zgljediš kak da si z rata došel. Mama te več jeno vuro išče po celjem selji. Ve je odišla bes tebe f školo.
Unda so soseda odišlji f kljet i f strogonjki so doneslji naružđeno kuruzo, resipalji so jo po zemlji i reklji:
– Ve si tu na kuruzo pokljekni i Boga molji tak dogo dok mama dojde dimo!
A jo pitam:
– A kaj bom moljil? Jo znom samo Očenoša, a Zdravo Marijo se bunim i ne znam do kraja, alji znom Anđelje čuvaru milji. A soseda veljido:
– Molji kaj znoš i to tak glasno kaj te bom jo f kuhnju čula.
Joko dogo sem moljil. Noge so mi več ftrnjovalje. Vutemtoga je došla i mama i unda je ona počela vikati:
– A de si ti, prasec jeden balavi? Soseda dejte mi rasove kaj ga prepičim kaj štakora! Mama me prijela za roko i se do doma me pocala po riti, a jo sem tuljil kaj steklji pes.
Tak sem jo mom prvi den školje ne bil f školji i sigurno mje drogarica učiteljica Dragica zapisala neopravdane sate.
petak, 08.04.2016.
JAPICA SO HMRLJI, BOK JIM DUŠO ZVELJIČI I GREHE OPROSTI
JAPICA SO HMRLJI, BOK JIM DUŠO
ZVELJIČI I GREHE OPROSTI
Moj japica so bilji joko šegovoti čovek. Dok sem se jo još ne narodil, oni so korte za cuk prodovalji na štacjono, i to za peneze. Prije je ne puno cugof išlo tak da so oni z doma z becikljinom išlji na štacjon i unda so korte prodovalji i unda nazoj pravac dimo z becikljinom. Sosed Donči so mi jempot reklji:
– A ti znoš, Štefo, da so tvoji japica jeden ot prvi f selji melji becikljina i bilji so svecki čovek jerbo so na štacjono korte prodovalji.
Ot kak so mojka hmrlji, Bok jim dušo zveljiči i grehe oprosti, japica so postalji malo bolje močeči, alji so se sejeno šoljilji s svojom sestrom kojo smo si zvolji mojka Tilča. Jempot so mojka Tilča došlji k nam, a unda so pok japica išlji k mojki Tilči. Jo sem jim bil kak posilni jerbo sem jim moral iti kupiti ribice f konzervi i črno Laško pivo. I saki pot sem dobil jeno ribico i smel sem pene ot pive poljiznoti. Japica i mojka Tilča so se zmetalji s penezi saki je dol pol, alji so mojka navek reklji:
– Ti tvorec jen stori, pok si me fkanil. Am naj me navek fkanjuvati.
– A ti coprnica jena stora! Net si znola računati, net nigdor naš! Kaj stolno hrbečeš kak sraka.
Tak so jim japica povedalji. Navek so se tak napoprečki menilji, alji jo sem znal da se oni zapraf joko voljijo jerbo so se shođalji skoro saki den.
I unda so japica nekak samo ot sebe najempot počelji žoteti i joko krehuntati i stolno so pljuvalji. Mama jim je rekla:
– Japa, morate iti k doktoro kaj vam nekvo vročtvo do.
A oni so samo reklji:
– A dej naj, Treza, smehe povedati! Koga vroga mi do? To tje ne betek, to tje starost!
Jedostavno sem se zdošel i to tje to!
Neso več melji voljo niti ribice s konzerve jesti, niti pivo Laško črno piti. Malo so si samo gotnolji i ostajlji. Došlji so njis i mojka Tilča gljet i reklji so:
– Moral bi si nekaj krepkoga pojesti kaj se zjočiš i kaj boš mogel na noge! Pošlji Štefeka kaj ti pe kupiti frtolj kilje govedine pok ti Treza skuha govecko juho. Čisto si na nojgi!
A japica so jim reklji:
– Sem se ne posej najel. Kaj bi štela kaj se bo po selji povedalo za mene kak za Dončijevoga japo? Storec so hmiralji pok so poslali Dončija po frtolj kilje govedine kaj jim juho skuhajo. Prije nek je Donči došel z govedinom, storec so hmrlji. Unda so fljetno poslalji Dončijo glose nek brže nazoj odnese govedino jerbo so storec hmrlji.
I tak so jeno soboto japica najempot zdehnolji. Veljičasni so ji skrizmalji, mama je dopljera vužgala i bilji so najempot čistam mrtvi. Si so se počelji plakati i narekati. Japici so čislo v roke delji, a to je zapraf bila bedastoča jerbo kak morejo čislo moljiti ak so mrtvi. Vujna Franca mje rekla:
– Štefo, odbeži k mojki Tilči i reči da so japica hmrlji.
Jo sem momce skočil i bilo mje se nekak joko čudno. Počelje so mi i soze iti i f požeroko me nekaj rošpalo. Došel sem k mojki Tilči i rekel sem:
– Mojka Tilča, znote kaj se pripetilo? Najempot da ste pri nas jerbo so japica hmrlji, i to zapraf. Vujna Franca so reklji da je japici na roki srčano žila počila.
Mojka Tilča so me samo oštro pogljedalji i skoturala jim se jena debela soza, a unda so reklji:
– Kakva mo je to ve bila turska sila iti hmirat? Pok kaj je ve ne mogel prvoga počakati pok si penzijo zdiči i unda hmreti? Ve bote samo veljke stroške melji sprevodom i s korminom. A kuljko je ve penez s tem svojem hmiranjem zarojtal?
I tak so se japica, Bok jim dušo zveljiči i grehe oprosti, preseljilji k mojki prek druma na grobje.
subota, 02.04.2016.
NA VALJENTINOVO PO ČIŽMICE
NA VALJENTINOVO PO ČIŽMICE
Nekak mom zaron so k nam došlji vujec Roki, a jo sem bil još na postelji pok mi veljido:
– Štefo, za Boga miloga, pok ti još spiš?
A jo njim onak malo pospono veljim:
– A kajbi, vujec Roki. Kajbi spol, samo se malo još dostojim pok pem gori.
A vujec Roki mi dalje veljido:
– Najempot se stani i begac pred grobje! Moraš bos bežati i ako dobežiš bos do grobja, dobil boš črljene čižmice. Pred grobjom vrane imajo pun drošec črljeni čižmici i so deca koja dojdejo bosa, dobido od vrani čižmice.
I jo sem tak skočil kaj da me je nešto šilom v rit fpičil. Fljetno sem se bljekel i bos begac do Grintafca. Vuni je bil snek i tak me zeblo za noge kaj sam skamuskal kak malji pesek dok mo vrota nogo priprejo. Grintavec je još crkal, a jo mo dolji s postelje potegnem dunjo i viknem:
– Ivo, najempot se stani, idemo po čižmice!
A Grintavec se još praf niti ne zbudil pok velji:
– Kakve čižmice? Jo imam gumene čižme i jo si nam nikve druge kupuval.
– Ma, Ivo, zabadaf dobimo prove čižme, a ne gumene, i to črljene. Ve so bilji pri nas vujec Roki i reklji so da se moramo požuriti kaj nado sfaljilje.
Tak je i Grintavec mom skočil, obljekel se i mi bosi beš kak nas noge nose prema grobjo. Tak nam je bilo zima kaj so nam se skoro šmrklji v noso zmrzlji. Srelji smo strica Ivija koji so nas pitalji kaj se pripetilo kaj tak fest bežimo. A jo sem Grintafco rekel da ne sme strico Ivijo nikaj reči jer bodo sigurno i stric Ivi za nami dobežalji po čižmice.
I dojdemo mi pred grobje, akat tamo, nega nikvi drošci, niti vron, niti čižmici. Kaj pok je ve to? Pok de so te vrane? Mi se ogljedovamo gori-dolji i štrpčemo kak da bi zelje gazilji jerbo nam je bilo joko zima. Grintavec velji:
– Sigurno so z druge strone grobja.
I mi begac se kolji grobja. Najempot pred nas z grmja nekaj skoči. Grintavec vikne: – Vok!
Tak smo se zbesilji kaj smo ot stroha skoro dolji palji. A to je ne bil vok, nego
ljesica, i to prova. Živa. A jo veljim Grintafco:
Telje jeno! Kakof vok! Pok ne vidiš da je to ljesica, i to prova!
A Grintavec mi velji:
– Štefo, jo idem dimo i jo več nam bos toga snega prtil. Tu me još nekva zver zakolje.
Nego, Štefo, ve dok bomo bežalji dimo, moramo bežati na rikverc. A jo ga zapitam:
– A zakaj na rikverc?
A Grintavec mi odgovori:
– Ne smemo protif vetra bežati kaj nam se nado joči zmrzlje.
I tak smo bežalji na rikverc. Dobežalji smo do vujca Rokija se premržnjeni, a vujec Roki se smejejo i veljido vujni Franci:
– Franca, poglječ ti naše dečke đerđene! Glje kak imajo samo ljepe črljene čižmice. A vujna Franca veljido vujco:
– Ti norc stori! Da boš več jempot mel nekvo pamet? Deca, tak so i njega njegof japa poslalji pred grobje po čižmice pok je, kak i vi, došel dimo spremržnjeni š črljenemi bosi nogami.
Grintavec i jo smo bilji tak srditi kak steklji cucki i nejrejši bi bilji vujca Rokija zgrizlji. Ne nam je bilo tak strašno kaj smo skoro otrdelji ot zime, nego kaj smo ne dobilji čižmice. A jo veljim Grintafco:
– Ivo, več nigdor ne smemo vujco Rokijo verovati kaj veljido jerbo oni lažejo još bolje nek soseda Bora.
subota, 26.03.2016.
MIKLOŠEVO
MIKLOŠEVO
Za Mikloševo je obično snek i deca se po celje dneve sončejo i korčoljerajo koji imajo korčolje ilji s karabitom pocajo i komaj čokajo dok dojde večer kaj dojde Mikloš i Krampos. Alji oni to hodajo jen den prije Mikloševoga. A v noči se škornje spucajo kaj so svetlje kaj glajš ilji zrcalo i unda se na Mikloševo dobido nekvi darovi: cukori i nekaj sljičnoga. Tak je bilo i dok sem jo bil malji.
Mikloš je došel v ganjk, a ž njim i Krampos koj je z lancima zružil. Mikloš je mel belo cpodnjico oblječeno i gori je mel hičeno belo plofto. Na glovi je mel biškopsko kapo, a to je zapraf bil paperni škernecljin. V roki je mel nekvo hačinjgo, a prek plječ je mel plofto svezano kaj da ide kuruzo brot. F plofti je bila narezana repa, koščice, orehi, jaboke i por cukori.
Dok je Mikloš došel k nam, jo sem si isti čas moral pokljeknoti i moljiti. Tak sem se prebesil kaj sem se vu tem čoso ne mogel zmisljiti niti jene moljitve. Niti a niti be. A velji meni Mikloš:
– Štefo, kaje? Ne znaš niti jeno moljitvo? Bom moral Kramposa pozvati kaj te z lancima sveže.
I Krampos je najempot domrčal f kuhnjo. Bil je prestrašen. Na glovi je mel kroske roglje, se je bil oblječeni f črnino, i obraza je mel namozanoga š črnem boksom. Mesto pojasa je mel lanca, a jenoga lanca je mel v roki, a v drugi roki je mel rasove. I Mikloš vikne na Kramposa:
– A kam te vrok nosi nuter! Jo znom da Štefek zno moljiti, samo mo je ve zabeglo.
Krampos je moral mom nazoj vun iti v ganjk i Mikloš mje dol jenoga cukora. I mom sem se i moljiti zmisljil jerbo sem videl da je Mikloš čisto na moji stroni. Moljil sem Očenaš, Zdravo Marijo, Slava Oco, Vjerujem u Boga, Anđelje čuvaru milji. Se mje najempot došlo v glovo. Alji me nazoj nekof stroh lovil dok se Krampos čes ganjčena vrota naljukoval. I unda mje Mikloš dol narezano repo, orehe, jeno jaboko i bil sem joko srečen dok me podrogal po glovi i dok je rekel:
– Znal sem jo, Štefo, da si ti dober dečec i da znoš moljiti.
I unda so samo najempot obedvo dišlji vun. Drugo jutro dok sem se zbudil, f škornje mje mama dela jeno jaboko i jeno mošnjico cukora 505 s crtom i bil je kre škornji jen malji pušljec šibe svezane. Neje bila veljka šiba, nego ona mala za tenjerce pljesti.
Unda sem jo misljil da mje to sveti Nikola donesel, alji to so bedastoče jerbo to roditelji deco fkanjujejo jerbo jim to oni somi namečejo f škornje. Sveti Nikola ima pametnešega posla.
subota, 19.03.2016.
Jo i Grintavec smo feringe skljinžalji
JO I GRINTAVEC SMO FERINGE SKLJINŽALJI
Dojde jempot Grintavec k nam i nesmo se moglji zmisljiti kaj bi se ljepoga igralji. A unda pone na pamet Grintafco jena hurmasta ideja pok mi znogla velji:
– Štefo, de so vam škorje?
A jo ga onak začuđeno, jerbo sem se začudil, pitam:
– A kaj če ti škorje?
A on mi velji:
– Pogljej te feringe kak ido miš-maš, malo gori, malo dolji. Čemo je to spodobno?
Jo misljim da bi mi to moglji zravnati škorjami i unda bodo ljepše zgljedalje.
A jo mo srdito veljim:
– Am naj biti nori! To tak mora biti. To so tak scifrane feringe kaj na doljnjem
krojo ido cik-cak.
A Grintravec me prime za roko i otpelja f kuhnjo i velji mi:
– Štefo, si se ti boksa najel? Pogljej te feringe i reči mi kaj vidiš! So dolji rovne ilji so ne?
I zbiljam, feringe f kuhnji so bilje rovno odrezane. Grintavec mi velji:
– Idemo mi i one fiži tak zravnamo i unda se moreš mami prefoljiti da smo ji ljepo feringe zravnalji i morti dobiš kojega dinara za karamelje ilji turski met.
I mi, ne bodi ljeni, počnemo kljinžati feringe, alji nikak nam je ne išlo jerbo so feringe stolno bilje nekak na heljaj. I več smo feringe tak skljinžalji kaj so bilje do pol obloka, a Grintavec velji:
– To je, Štefo, zoto kaj me ti furt dručeš dok režem. Alji nikaj se naj storati, se bo dobro. A to tje i joko dobro kaj so feringe do pol obloka – moreš mom videti na vuljico što ide i ne moraš feringe odgrinjati.
A mama je najempot na noglo došla dimo s polja i ima kaj videti. Po hiži so skljinžane feringe. Mene je prijela, a Grintavec ji je fegnol i begac dimo. Tak je vehlal kaj so mo pete vrit pocalje. Mama je za njim viknola:
– Čekaj se samo, tolovaj ti jeden! Prasec jen praseči! Samo mi se još jempot skoži na našem grunto i jo te prepičim z rasovami kaj hrčico!
A jo mami veljim:
– Mama! Jo sem nikaj ne krif! To me Grintavec nasamoril.
A mama ljusk pok ljusk i zija nome:
– Fruga ti jena hrastova! Ti si ne kriv, kaj bi ti bil kriv. Da si mi več ne beknol! I žuk pok žuk. Tak sem skokal sim-tam kak koza. A unda mje donesla naružđeno kuruzo i moral sem na kuruzi klječati i tak klječeč graha trebiti.
Por dni sem ne hupal iti Grintafco, a niti on k nam jer je znal da bo fasoval. Alji unda so došlji soseda Dora k nam rasove posoditi jerbo so melji dolji puno krme. I jo begac po Grintafca i mom ot potni vrot zaviknem:
– Ve se moremo pri nas igrati jerbo je mama rasove posodila sosedi Dori pok te nemre z rasovami prepičiti kaj hrčico.
I Grintavec je došel se k nam igrat, a mama mo je rekla:
– Ako još jempot nekvoga kvora naprojite, jo vam obedvem vuha ščešem. I tak smo se jo i Grintavec i dalje skupa porilji.
subota, 12.03.2016.
RACE SMO NAGONJALI
RACE SMO NAGONJALJI
Moj nejbolji pajdoš još s tejo deteči dnevi pok se do denes je Ivek ot soseda Jondrija i sosede Mare. On je tuljko star kak i jo i navek se skupa igramo. Ivek stolno dela nekve hamaljije i bedastoče, a soseda Mara stolno vičejo na njega i zmišljajo mo. Čim nekvo bedastočo naproji, mom viknejo:
– Ti grintavec jeden! Nigdor naš mel nikvo pamet!
A to so čula i druga deca i zmisljilji so mo Grintavec. Tak ga ve i zovu. Jo ga tak ne zovem, alji dok je ne z menom, unda i jo veljim Grintavec ot soseda Jondrija i sosede Mare.
Bljizu druma je jena graba koju mi zovemo Čenjčec. Voda je nekak do koljena i navek je zeljenkastosmeđa i mutna i tu se furt goske i race kopljejo.
I velji meni Grintavec:
– Čuj, Štefo, kaj veljiš da mi idemo f Čenjčec goske i race naganjat?
– Ajt idemo!
Na guni smo si s snopa spuknolji, saki po jeno debelo šibo i pravac direkt k
Čenjčeco. Dok smo bilji kre grunta strine Jone, Šeki se počel zahrkovati i begati ot plota do plota i lajal je kaj besni pes dok pobesne. Šeki ot sosede Jone je joko hmonji cucek i ima joke zobe i navek bi nekaj grizel i jel. Soseda Jona mo veljido:
– Gladuš jen požrljivi! Nigdor tje ne dosta! I čavlje bi pojel!
Malo smo postolji i čes plot smo Šekijo čobe kozalji, a unda je on počel još bolje lajati. A jo veljim Grintafco:
– Dej hodi idemo, kaj bomo ve tu do polneva čobelji!
I dišlji smo k Čenjčeco. Pun Čenjčec roc i gosek. I mi se zabežimo s šibami i nega več cilje-milje, nek žuk pok žuk. Mlotilji smo race i goske se po redo i kriš-kraš. Tak so se prebesilje kaj so počelje poljetovati po vodi jerbo so ne moglje tak fljetno plavati kak smo mi begalji. Akat tamo, najempot mene na desni nogi nekaj tak zapeče kaj sem se zvezde videl makar je bil den. To se samo tak velji. Znal sam da ljudi hičejo f Čenjčec potrto steklovje i glajžovje, store ronjglje i šefice i sikakve bedastoče. Zdignem jo desno nogo, culo ti cusravo, imam jo kaj za videti. Z nogom sem zdigel i koso koja mi se v nogo zapičila. I to ne nova, nego hrđova kosa. Zatuljil sem kak nori i zaviknol:
– Gotof sem! Ve sem gotof! A Grintavec me pita:
– A kaje, Štefo?
Jo mo veljim:
– Si čoravi! Kaj ne vidiš da sem koso vritnol?
Grintavec mje spuknol koso z noge, a krf je tak šiknola skoro kaj z vatrogasne šprice. I to temnočrljena. I velji mi Grintavec:
– Štefo, moral boš reskerati robačo kaj ti nogo svežem, inače boš skrvoril kak pajcek dok ga zakoljejo.
Slječem si jo svojo ljepo plafkasto porhotno robačo i Grintavec mi zaveže nogo. A jo veljim:
– Ve nemo po drumo dimo jerbo me bodo ljudi spitovalji kaj sem si naprajel, nek pemo po poljo.
Komaj sem do doma došel. Vu vuhi mje šumelo i nekak mje išlo slabo. Robača je bila so krvova dok sem došepesal do doma. Mama se za glovo prijela i nekaj je viknola, alji se jo več ne zmisljim kaj jerbo sem najempot nestal i zrušil sem se na zemljo kak mrtef. Dok sem se nazoj zbudil, lježal sem na nekvi postelji i bil sem povezani z nekvima žicami, a ober mene svetlo i doktor i sestra. A doktor velji:
– Evo nam ga! Vratio se Štefek natrag k nama.
Potlji mje mama prepovedala da so me š črljenem križom tpeljali f Čakovec i da so mi nogo šivalji. Alji jo se toga ničega ne zmisljim. Potlji sem hol k našemo doktoro na previjanje. To se samo tak velji. Nikaj so me ne previjalji, nego so mi samo frbanta menjalji i novoga delji. Mama me peljala na becikljino, a unda dok so mi frbanta premenilji, išlji smo k sladoljedoro Fadelo i mama mje kupila turskoga meda. Nikaj je ne no me vikala, niti sem ne bil bit. Samo mje rekla:
– Nigdor da si več ne išel po Čenjčeco gazit. Ako peš, unda boš fasoval svoje kak si ne još nigdor!
A te doktor f Čakofco mje nogo joko dobro skupa zašil. Još i denes imam na nogi črljenkasto crtico de je bila noga zašita, alji tak dobro zašita kaj mi se do denešnjega dneva ne rasporila širom.
subota, 05.03.2016.
6. ČAVELJ I STRUJA
ČAVELJ I STRUJA
Narodila se moja sestra Katica i mom od rođenja je bila dosadna jerbo se furt samo bečala, a mama je morala stolno conjke prati. Alji bilo je to i ljepo vreme za mene jerbo so mami žene nosilje dvorbo, a tu je bilo i koločof i mesa sakefelje i saki den juha od mladine.
Si so se samo rivalji kolji Katice i mame. Tak sem jo ne bil joko pot kontrolom i mogel sem kvora delati, a da sem za to ne bil bit.
Tak sem si jempot premišljoval kaj bi se mogel igrati kaj mi na dosadno. I pola mi je na pamet jedna bedastoča bedasta. Gljedim jo svojim jočima one dve prelce na štekero i premišljovam si kak to struja, kaj je nutri f prelcima, ne zide črez prelca vun, a prelca so ne zateknjena? I jo, ne bodi ljeni, pravac f kljet. Tam sem našel jenoga dokšega hrđovoga čavlja i ž njim se vrnol nazoj f kuhnjo. Nikoga je ne bilo f kuhnji i skoristil sem priljiko kaj bom videl kaj bo struja naprojla ako jo š čavljom jeno prelce zateknem. I porinem jo čavlja v jeno prelce, a unda, culo ti cusravo – ljusk! V glovi i po celjem telji mi se nekaj zvihrilo i ves sem se joko stepel kaj da me struja stepla. Najempot sem dljetel pot stol i vudril sem se f stolovo nogo i f štokerljin i ves sem bil kaj f tomlji. Bil sem najempot od a do ž moker kaj da me nešto z vodom bljihnol.
Mama je došla f kuhnjo jerbo je došla po ščonjaka kaj dnese svinjom ščavo. Malo se začudila pok me pita:
– Sino, a kaj tu delaš pot stolom?
A jo veljim:
– A nikaj! Nekaj mje palo pok dosižem.
Komaj sem čakal kaj je mama dišla vun i unda sem se odvljekel kaj megla pomalji f posteljo jerbo sem nekak ne bil provi. I vutemtoga sem i zaspal. I ot toga dneva sem joko dobro znal da se več nigdor strujom ne smem norčiti jerbo sem komaj ostal živ žifcati.
subota, 27.02.2016.
4. BECIKLJIN
4. BECIKLJIN
Dok sem još bil malji, mi smo melji muškoga becikljina na kojemo so se i mama i japa vozilji, a i jo sem ga porivoval po grunto i kesal. Mama ga je več ne vozila jerbo je mela debelo čerevo, a f čerevi je bila moja sestra Katica koja se još ne narodila, alji se bo skoro. Mama me ne mogla držati dok sem se vučil voziti jerbo je s tem veljkem čerevom ne mogla bežati i tak sem se jo som vučil voziti becikljina. Z jenom, i to ljevom, rokom sem rižil s kormonom, a z desnom rokom sem se držal za rušt i podrušt sem se počel voziti.
Unda je na vuljici još ne bilo asfalta, nek so vuljice s šudrom zavožalji de so bilje grabe. Praf unda so bilji kupi šudra po celji vuljici navoženi i trebalo je toga šudra samo reshitati po graboj. I tak sem se jo dolji z druma vo vuljico z becikljinom pomalji spuščal. Nejvekši probljem mje bilo stati. Nesem znal stati z becikljinom i saki pot dok je trebalo stati, jo sem se zapičil pravac direkt na kup šudra i samo sem se na šuder prehitil i becikljin je otšuba stal. A to je bilo joko dobro jerbo so si kupi šudra bilji na ljevi stroni jerbo me becikljin stolno na ljevo zanošal. Noge so mi bilje malo zguljene, alji nikaj zoto jerbo sem se več zastovljal pre tretjemo kupo. Pok unda nazoj na drum pešice i dolji zdruma saki pot za jen kup dalje.
A drugi – alji bi se moglo reči skoro prvi, a ne drugi probljem – so mi bilje kokoši i race koje so baš unda moralje iti prek vuljice. Nekoje so išlje botromo pomalji i ne njis je bilo stroh kaj njis bom zjahal, a druge so fljetno prebegovalje. Jeno čučo golovrato sem s kotočom skoro zjahal. Za dlako je faljilo. Alji se to čuča golovrata tak joko zbesila kaj je počela tak fest kokodokati i bežati kaj da ji je nešče feferona ljutoga ekstra šarf v rit porinol, i ljeso je preljetela i pravac direkt na grunt. To je bila čuča od soseda Jondrija.
Več sem se tak sprakseral kaj sem išel kak na mlazni pogon. I veljim jo som sebi:
– Ajt, Štefo, probaj se peljati do kraja vuljice i unda v drugo vuljico.
Tak je i bilo. Alji dok sem došel do kraja naše vuljice i dok sem zavinol f
Posmodijevo vuljico, unda sem po provem nahrdal. Več je ne bilo šudra! A kaj ve? Samo sem dalje tiral i gruntal sem si kak bo to na krojo završilo. Dopeljal sem se do cirkve, alji šudra nigdi. Ajt kolji cirkve i pravac nazoj prema domo.
Joko sem bil srečen dok so vujec Roki za menom zaviknolji:
– Te prestvoril negdi, Štefo! Pok ti se znoš peljati na becikljino, a jo stori osel ne!
I dopeljal sem se nazoj v našo vuljico, alji me unda zdeni znoj obljejal f kapljama jerbo sem došel v našo vuljico znopok. A to znači da mje ve šuder bil z desne strone, a jo sem se znol prehitovati samo na ljevo stron. I počel sem se več rožđiti jerbo sem skoro bil na krojo vuljice, a nesem mogel stati i nesem se mogel obrnoti jerbo je vuljica bila zome prevoska, a šuder mje bil z krive stroni. Sosed Đuri me pitajo:
– Kaj se, Štefo, bečiš?
A jo njim viknem:
– Ne znam stati!
A sosed mi viknejo:
– Počni tirati na rikverc!
I jo pretiram na rikverc i dok si rekel keks, becikljin je samo zašlojdral na mesti tak kaj se skodelo, zanesel se na desno i jo žuk! Ljosnol sem kak sem dogi i široki. So koljena sem si zguljil. Nekak sem došepesal dimo i fljetno sem becikljina otpeljal f kljet. Mama je vidla da imam zguljena koljena, pok me pita:
– Kaj si si naprajel, Štefo?
A jo veljim:
– A nikaj! Smo loba ritalji, pok sem opal.
Sem ne vupal reči da sem z becikljina opal jerbo sem bil stroho da mi mama večna dola becikljina.
petak, 19.02.2016.
3. AVTEK
AVTEK
Videl je moj japa da se jo nejrajši igram s frtoljkami ciglji i da po celje dneve brnim i da so ti ciglji prafzapraf moji avteki i traktori. Za Dan dečje radosti dobil je na Grockem peneze za mene jerbo sem jo bil te kojemo se za Dan dečje radosti z naše familjije trebalo dati peneze jerbo se moja sestra još ne narodila. I kupil mje zote peneze ganc novoga avteka na ključ koj se navija. Zeme se ključ, ftekne se v avtek i obroča se tak dogo dok se more i unda je avtek navinjeni. Unda se pusti na zemljo ilji na pot i ide som ot sebe kaj navinjeni, a zapraf je i je navinjeni. I dogi čas lječe i unda najempot stone som ot sebe i ni makac dalje i unda ga nazoj treba navinoti. Bil je to avtek ajnc a. Bil sem joko srečen i presrečen kaj sem dobil takvoga avteka i rekel sem japi:
– Japa drogi, Bok ti stopot ploti. Nikaj boljega i ljepšega si mi ne mogel kupiti.
A mama je jomrala i govorila japi:
– Bolje da si mo zote peneze kupil nekvo obljeko ilji si zote peneze mogel kupiti dvo korake jegera.
A japa se samo nasmejal i onak nasmejoni rekel:
– Nek se dečec igra! Kaj bo s tem ciglovjem po grunto brnel.
Od naši križovoti kumi, ot kuma Vincija i kume Ruže, sin Brankec je bil zaposljeni na Ekonomiji i vozil je traktora, i to ekonomskoga. Alji ekonomčani so ne melji Zetora nego traktora Tomo Vinkovič. Tomo Vinkovič je ne tak joki kak Zetor. Jerbo Zetor je provi prafcati zmaj. Ide kaj besni.
Brankec je saki den došel dimo k obedo i traktora je ostajel na vuljici dok je obedoval, a potlji obeda ajt dalje. I jempot tak meni mama vikne:
– Štefo, ajt k obedo! Juha se bo prezdenila! Mom da si tu!
A jo trkac i svojega avteka sparkeram dzoj za Brankecovem traktorom na poto i idem k obedo. Mama je skuhala fino prežgono juho i kalampera poljejonoga z ljukom i moščom. Moja mama dok kuha, furt nekaj po kuhnji fuca i navek ji se ljuk pregori i navek je črni. Dok sem se najel, misljil sem si – idem ve jo po avteka i, kak i Brankec, ajt dalje. Akat tamo, imam jo kaj za videti. Mel sem najempot veljke joči i celo vreme sem z jočima gljedal, alji niti Brankecovoga traktora niti mojega avteka nigdi nega. Jezoš Kristoš i Majka Božja Bistrička, kaj je to ve? Kakve so to hamaljije? Mom sem na mesti bil skoro šlagerani kaj mojka. Misljil sem da mi se bo pamet zmela. Počel sem se rožđiti kaj nori i vikati:
– Mama, nigdor na dobro! Nešče mje avteka fkral, i to namerno!
Mama je došla vun i počela no me zijati:
– Bikonja jen neotesani! Balavec jen balavi! Da te strela Božja ljupila! Ve te bom zljemala kaj vola kaj ti bo mom kraj. Kaj si ti deherbana spil? Pok što je videl igročke na poto stovljati? Jo te ve spoterem, a japa te bo reščehnol dok dimo dojde.
I unda me prijela za roko i ljusk pok ljusk z hločnjakom tak kaj sem po riti čurke mel. Misljil sem da me bo hmorila. Pret sponje sem Boga moljil kaj pe moja mama f pekel jerbo me joko bije.
Por dni sem bil joko tožen, kaj tožna vrba. Ne mi se bilo volja igrati. Samo sem dudel na guni i premišljoval si kakvo sem bedastočo naprajel. A i mami je bilo nekak žal kaj me tak joko zbila pok mje rekla:
– Naj se, Štefo, storati, se bo dobro! Ak boš dober, japa ti kupi novo igročko, alji ne smeš se nikaj funjiti.
Unda sem si i jo nekak to šenkal i pojel sem si belo kovo z nadrobljenem kuruznem kruhom. I išel sem unda pred štalo i brnel sem s frtoljkjom cigla koj mje bil mesto namerno fkrođenoga avteka.
subota, 13.02.2016.
2. BIK JE PREK MENE SKOČIL
BIK JE PREK MENE SKOČIL
Dok sem bil malji dečec, joko sem se rado igral i to na grunto jerbo se mala deca ne smejo igrati na poto kaj njis na zjahal Zetor ilji kakof drugi traktor ilji pok avto. Nejrejši sem brnel i posmikoval frtoljko cigla po proho i to mje bil avto ilji traktor. Na cigel sem z vogljenjem narisal obloke i bil je kaj provi avto.
Jempot sem tak brnel s frtoljkom cigla pre štolnem poceko i najempot je nekaj prek mene skočilo. Malo sem se zljecal. Ot stroha sem opal na vlastito rit. A to kaj je skočilo je bil naš bik koj se f štalji rezvezal i skočil je prek mene i ljetel je po grunto kaj eroplon. Zritoval se po grunto kaj icek. A joj, meni, joj! Ot stroha sem se v gače poscal, alji sem sejeno mojki viknol:
– Mojka, meni je joko sila iti cukat!
A mojka, dok so vidlji kaj je bikonec prek mene skočil, so ne čulji da je meni sila cukat iti, nego so samo viknolji:
– Za pet ron Kristošovi! Jezoš Kristoš i Marija, pomogajte! Dečeca je te pekljenski duh hmoril! Of čas bom na mesti mrtva jerbo sem šlagerana.
I unda so se najempot zrušilji kaj puna vreča dok jo nešče porine. A jo sem se počel strašno i prestrašno bečati i vikati:
– Mojka, mojka, najte hmreti jo bom dober i to zanavek!
Odnekot so se najempot stvorilji soseda Mara i počelji so mojko zdigati i vikati:
– Soseda, soseda! Zdignite se! Jondri, fljetno sim hodi!
Došlji so i sosed Jondri, odneslji so mojko fižo i poljeglji so njis onak oblječene z
opravom na posteljo i počelji so njis mocati z mokrom krpom. Jo sem se i dalje rožđil i bil sem stroho za mojko kaj provi strahopezdec. Mene je nišče ne mel čas preslječi, nek sem onak posconi štrptal kre postelje. Nešče je bika prijal i svezal nazoj f štalo. Misljim da so to bilji sosed Donči jerbo so i oni k nam dobežalji.
Mojka so dogo još lježalji i to na postelji. Neso moglji jesti i za por dni so tak joko osuhelji kaj so bilji suhi kaj slota.
Akat tamo, jenoga dneva so samo tak š čistoga mira hmrlji, Bok jim dušo zveljiči i grehe oprosti. I unda so njis na grobjo zakopalji. A onoga prasca, bika, so japica f krej dolji jerbo drugo je ne niti zavredel. Mrcina jena prokljeta, da mrcina.
subota, 06.02.2016.
I. DOK SEM BIL MALJI
1. DOK SEM SE NARODIL
Pri nas je negda bil običaj dok se dete narodilo kaj so mo v rokico delji nekaj kaj bo potlji v životo postal. Ak so deteto delji v rokico zidorsko žljico ilji fangljina, unda bo zidor. Ako kohačo ilji vesljico, unda bo kuhar. Ako rasove, unda bo na poljo delal i takve druge sakefeljejočke stvori.
Jo se toga ne zmisljim, alji so mi teca Malča jempot reklji da so mi japica štelji v rokico deti metra kaj bom cimerman, alji so mojka reklji:
– Kaj gojt! Kajpok der nej! Ako mo se na krovo nekaj zvihri pok se ljefko posmekne i dolji pone i zatoče se. Denite mo v rokico tintanoga klajbesa kaj bo školovani čovek i gospon čovek na svojem mesti.
I tak se i trefilo. Jo sem školovani, alji ne joko fest. Završil sem osmoljetko i kaj da veljim, osmoga razreda sem opetuval, a za to so krivi oni hrgeši Japonci koji zmišljajo bedasta imena za svoje otoke. Alji otom-potom. A i gospon čovek sem skoro jerbo delam v grodo Zogrebo i to na Grockem, a za one koji so ne f to fpučeni da veljim samo krotko i jasno da se Čistoča zove Grocko.
Jempot sem mamo pital:
– Čuješ mama, a kaj si ti rekla kaj mi v rokico denete dok sem se narodil?!
– A kaj te bedastoče spitovaš? To so store moringe koje nikaj ne znoče. Meni so v
roko delji teko kaj bom učiteljica, a završila sem samo štiri razrede školje. Dok sem morala iti f peti razred, so me japa vun z školje zelji pok so reklji da se oni nado po gruđjo na poljo somi popikovalji dok si bom jo f školji rit čohljala.
Jo ak bom negda mel dečeca, jo mo bom v rokico del ključa od Zetora ot teca Froncija, kaj bo, dok zroste, mel Zetora i to ganc novoga zeljenoga i kaj bo oral, gnojščico vozil i gnoja i kaj bo to delal za nadnico drugima i kaj bo ljetel po vuljici tak kaj bo kamenje frcalo na se strone.
nedjelja, 31.01.2016.
UVOD
Sjedio sam za uskrsnim blagdanskim stolom i uživao sve blagodati obilnoga i ukusnoga jela. Stol je bio pun raznovrsnoga mesa s nezaobilaznom šunkom, hrenom, kuhanim jajima, mladim lukom, a bilo je tu i nekoliko vrsta kolača od dizanoga tijesta. Vino iz pitomih brežuljaka Železne Gore upotpunjavalo je sve te gurmanske delicije.
Iznenada začujem bat koraka iz hodnika i na vratima se pojavi Štefek, moj daljnji rođak.
– Faljem Bok, Ivo! Srečen ti Vuzem! Videl sem da je avto na grunto pok sem te došel gljet. Štel bi te nekaj pitati. Znoš, jo več dogo pišem književnost, očem reči knjigo, alji ne znam tipkati, pok bi te jo prosil kaj bi mi ti to natipkal. Naj biti stroho, na ti zabadaf. Evo, jo sem ti za početek donesel jeno šunkico i pet ljitrof vina, a dok bo se gotovo, unda naprojimo obračuna. Znoš, jo sem ti najpre počel to svojo knjigo pisati po gracki, alji sem štel kaj bi to se bilo točno, pok sem to odnesel Ivanki, čeri od soseda Đure i sosede Dore. I znoš kaj je bilo?! Se mje počerbekala š črljenem klajbesom i rekla mje da jo ne znam po gracki pisati. A jo sem se tak razbesnel kaj sem bil kaj pes koj je pobesnel i dobil besnočo kaj steklji cucek, i veljim jo njoj:
– Čuj ti, šmrka jena balava, posrana. Kaj misljiš ako imaš te dvo razrede srednje uzaludne da si Boga za pete potegla. Jesi figo! Jo sem književnik i delam na Grockem v Zogrebo i znom po gracki govoriti. A kaj si ti i kaj ti znoš? Samo se znoš ljickati pred zrcalom i samo klomfe sereš.
I zaljupil sem z vrotima i odišel. I od unda pišem samo po međimorski jerbo mi to bolje ide.
– Štefek je bio sav crven i zajapuren od uzbuđenja. Vidio sam koliko je ponosan što je napisao knjigu, ona mu je mnogo značila i životni mu je san bio da to ima, kako on kaže, natipkano, pa sam pristao da mu učinim tu uslugu.
Može, Štefek, dogovoreno!
– Čokaj, čokaj, Ivo! Ti samo natipkovaj, alji naj nikaj poprovljati reči ilji rečenice jerbo si ti joko školovani i več si zobil po međimorski govoriti i sigurno bi nekaj nopok naprajel. Ti samo nameči točke i zareze de treba i one dve crtice nopri i dzoj na krojo rečenice, a ostalo naj nikaj poprovljati. Smo se razmelji?
Štefek je snogu popio dvije čaše vina, ostavio na stolu šunku i kanistar s pet litara vina te sav sretan otrčao doma po bilježnice sa svojim tekstovima te mi zadao neplaniranu aktivnost.
I.V.
